ترکی کی پارلیمنٹ میں نمائندوں کا ایکدوسرے پر لاتوں اور گھونسوں سے شدید حملہ

مہر خبررساں ایجنسی نے الجزيرہ کے حوالے سے نقل کیا ہے کہ ترک پارلیمنٹ نے عدلیہ كے اختیارات میں كمی كا بل منظور كرلیا تاہم اس دوران ایوان میں حکومتی اور اپوزیشن کےاراکین کے درمیان  لاتوں ،مکوں اور گھونسوں کا تبادلہ ہوا جس سے متعدد ارکان زحمی اور لہولہان ہوگئےہیں۔

اطلاعات كے مطابق ترک پارلیمنٹ میں عدلیہ پر حكومتی كنٹرول بڑھانے كے لئے اپوزیشن كی سخت مخالفت كے باوجود پارلیمنٹ میں حكومت كا پیش كردہ بل زیر بحث لایا گیا تو اپوزیشن نے اس کے خلاف احتجاج شروع كر دیا اور دیكھتے ہی دیكھتے ایوان مچھلی بازار بن گیا، شدید ہنگامہ آرائی کے دوران حكمران جماعت اور اپوزیشن اراکین کے درمیان شدید لڑائی شروع ہوگئی اور دونوں جانب سے مکوں اور گھونسوں كا آزادانہ استعمال كیا گیا جس سے 2 اراکین شدید زخمی ہوگئے جبکہ کئی معمولی زخمی ہوئے تاہم اس تمام صورتحال کے باوجود ایوان نے بل منظور کرلیا۔عدلیہ سے متعلق نئی قانون سازی كرپشن کے الزامات سے بچنے کے لئے حكومت كی آخری كوشش تصور كی جارہی ہے جو حكومت نے اپنے قانونی ماہرین سے طویل مشاورت كے بعد ایک بل كی صورت میں پیش كیا اور صدر عبد اللہ گل کے دستخط کے بعد یہ بل قانون کا حصہ بن جائے گا جس کے نفاذ سے حکومت کرپشن کے کیسوں سے نجات پاسکے گی۔واضح رہے ترک حكومت كو گزشتہ کئي ماہ سے مبینہ كرپشن کے الزامات كا سامنا ہے ۔